Նորություններ

Սփյուռքի հայկական կրթության զարգացմանն ուղղված կարևոր նախաձեռնություն է մեկնարկել M.A.M հայկական առցանց դպրոցի կողմից՝ AMAA-ի աջակցությամբ։

2025 թվականի հոկտեմբերին մեկնարկած և մինչև 2026 թվականի հունիս շարունակվող վերապատրաստման ծրագիրը միավորում է Սփյուռքի հայկական դպրոցների տնօրեններին և ուսուցիչներին մեկ հարթակում՝ նպատակ ունենալով վերաիմաստավորել և ամրապնդել հայկական կրթությունը համայնքներում։

Ծրագրի մեկնարկից ի վեր արդեն գրանցվել է ավելի քան 220 մասնակից՝ աշխարհի ավելի քան 35 երկրից, ինչը խոսում է նախաձեռնության կարևորության և պահանջվածության մասին։

Վերապատրաստումն անցկացվում է առցանց ձևաչափով՝

• տևողություն՝ 8 ամիս,

• հաճախականություն՝ ամիսը 2 անգամ,

• յուրաքանչյուր հանդիպում՝ 2 ժամ։

Ծրագիրը միտված է Սփյուռքի դպրոցներին տրամադրել ժամանակակից և կիրառելի գործիքակազմ՝

• արդյունավետ աշխատելու նոր սերնդի հետ,

• մոտիվացնելու և առաջնորդելու աշակերտներին ու ծնողներին,

• ակտիվացնելու համայնքային կյանքը և միավորելու հայերին ազգային արժեքների շուրջ,

• ինչպես նաև ստեղծելու փորձի փոխանակման կայուն միջավայր։

Բովանդակային առումով դասընթացները կառուցված են երեք հիմնական ուղղությունների շուրջ՝

Կրթություն
Ուժեղացնել մասնակիցների մասնագիտական կարողությունները՝ ժամանակակից մանկավարժության, առաջնորդության, ուսուցման հոգեբանության և նորարարական մեթոդների միջոցով՝ ձևավորելով մարդակենտրոն և արժեքային կրթական միջավայր։

Մշակույթ
Խթանել հայկական մշակույթի կիրառումը կրթական գործընթացում՝ որպես ինքնության պահպանման և արժեքային դաստիարակության հզոր գործիք՝ առաջարկելով գործնական մեթոդներ և մոտեցումներ։

Համայնք
Զարգացնել դպրոց–համայնք կապը, մեծացնել դպրոցի դերը համայնքային կյանքում և ստեղծել համագործակցության ու փորձի փոխանակման նոր հնարավորություններ։

Ծրագրի բանախոսներն են ֆորմալ և ոչ ֆորմալ կրթության, մշակույթի և հոգեբանության ոլորտներում փորձառու և առաջատար մասնագետներ։

Ծրագիրը ներկայացվել է ՀՀ ԿԳՄՍ նախարարություն և ստացել է ԿԶՆԱԿ հիմնադրամի դրական եզրակացությունը՝ ևս մեկ անգամ ընդգծելով դրա մասնագիտական և կրթական արժեքը։ ԿԳՄՍՆ փոխնախարար Արթուր Մարտիրոսյանի կողմից առաջարկվել է պատրաստված ծրագիրը և դրա իրականացման հնարավորությունները ներկայացնել և քննարկել սփյուռքի ուսուցիչների հետ հաջորդիվ կայանալիք վերապատրաստման ծրագրի շրջանակում:

Այս նախաձեռնությունը նաև սկիզբ է դրել M.A.M-ի գործունեության նոր ուղղությանը․ նախատեսվում է ստեղծել հարթակ Սփյուռքի կրթական ներուժի քարտեզագրման համար, որը կծառայի Սփյուռքի կրթության համակարգային վերափոխմանը։ Այս ուղղությամբ առաջիկայում կներկայացվեն հավելյալ մանրամասներ։